Skip to content

මේ ආණ්ඩුව වාරි සංස්කෘතියම විනාශ කළා - විපක්ෂ නායක

වත්මන් රජයේ දුර්වල ජල කළමනාකරණ ප්‍රතිපත්තිය නිසා මේ මොහොත වන විට උඩවලව කේන්ද්‍රීය වාරි පද්ධතිය භයානක තත්ත්වයකට මුහුණ දී ඇති බවත් මෙම ව්‍යාපාරය තුළින් නඩත්තු වන ඒකක 07ක දැවැන්ත කෘෂිකාර්මික ඛේදවාචකයක් නිර්මාණය වී ඇති බවත් විපක්ෂ නායක සජිත් ප්‍රේමදාස මහතා පවසයි.

අක්කර අඩි දෙලක්ෂ දාහත්දහසකින් යුත් උඩවලව ජලාශ්‍රයේ දැනට ඉතිරිව ඇත්තේ අක්කර අඩි 2,000ක් පමණක් බවත් මීට සති කිහිපයකට පෙර සමනල වැවෙන් ජල අක්කර අඩි 1,500ක් දෛනිකව ලබා දෙන ලෙස ඉල්ලීම් සිදු කළත් මේ පිළිබඳව විදුලි බල ඇමතිවරයා ප්‍රමුඛ ඇමති මණ්ඩලයත් ජනාධිපතිවරයාත් උනන්දු නොවීම තුළ ගොවි පවුල් 30000ක හෙක්ටයාර් 25000ක වී, උක්, එළවළු සහ බඩඉරිගු වගාව විනාශයට පත්වීම ආරම්භ වී ඇති බවත් විපක්ෂ නායකවරයා සඳහන් කරයි.

රජ දවසේ සිට මෙම වාරි ශිෂ්ටාචාරය දැවැන්ත ආර්ථික පද්ධතියක් නිර්මාණය කළ බවයි ඔහු පවසන්නේ.

මේ ජලාශ මඟින්  පානීය ජලයට මෙන්ම වගාව සඳහා ප්‍රමුඛස්ථානය ලබා දිය යුතු වුවත්  අඛණ්ඩව විදුලිය ලබා දෙනවා යැයි පවසා විදුලි බිල සියයට 500කින් වැඩි කර වගාවට අයත් ජලය විදුලිය සැපයීමට යොමු කර ඇතිහෙයින් යම් හෙයකින් විදුලි කප්පාදුවක් සිදුවන්නේ නම් එයට හේතුව වත්මන් රජයේ අකාර්යක්ෂමතාව සහ දුර්වල රාජ්‍ය පාලනය නිසා බවද  ප්‍රේමදාස මහතා ප්‍රකාශ කර සිටියි.

''වත්මන් රජය විසින් වාරි පද්ධතිය හරහා නිර්මාණය වූ වාරි සංස්කෘතිය සහමුළින්ම විනාශ කර තිබෙනවා.  වී, උක්, එළවළු සහ බඩඉරිගු වගාවන් ආදිය හරහා දේශීය ග්‍රාමීය ක්ෂුද්‍ර ආර්ථික චක්‍රයක් ක්‍රියාත්මක වන වුවත්  ඒ සම්බන්ධයෙන් ආණ්ඩුවට අවබෝධයක් නොමැති නිසා තමයි මෙම්හෙම වෙන්නේ. වගා හානි වුවහොත් වන්දි ලබා දී පිටරටින් හාල් ගෙන ඒමට සූදානම් වී ඇති බැවින්  ජනතාව විසින් ආණ්ඩුවක් පිහිටුවා ඇත්තේ වැඩක් නොකර හේතු දැක්වීමට නොවෙයි. ඒ නිසා  රටේ ජනතාව ආරක්ෂා කිරීමේ වගකීම ආණ්ඩුව සතුයි.''

දක්ෂ, සැලසුම්සහගත සහ කාර්යක්ෂම ආණ්ඩුවක් ලෙස පම්පොරි ගැසුවත් මේ සිදුවීමෙන් එහි සත්‍ය අසත්‍යභාවය පෙනෙන බවත් රජයේ දෙබිඩි වැඩපිළිවෙළ හේතුවෙන් ගොවියාත් සාමාන්‍ය ජනතාවත් දැඩි ලෙස අසරණ වී ඇති බවත් විපක්ෂ නායකවරයා වැඩිදුරටත් පවසයි.

Latest