Skip to content

NMRA අමල් බිසෝ තියරිය සභාපතිට හරිගියාට ජනතාව අනතුරේ!

ඖෂධ නියාමන අධිකාරියේ අමල්බිසෝ තියරිය තවදුරටත් ක්‍රියාත්මක වුවහොත්, බාල ඖෂධ නිසා නොමල කෙනෙක් සොයා ගැනීමට නොහැකි වන බව පරිපූරක වෛද්‍ය වෘත්තීයවේදීන්ගේ ඒකාබද්ධ බලමණ්ඩලය අවධාරණය කරයි.

එහි සභාපති රවී කුමුදේශ් මහතා පවසන්නේ ඖෂධ නියාමන අධිකාරියේ සභාපතිවරයා අමල් බිසෝ සහ කිසා ගෝතමිය පටලවා ගත් පරිදිම, ඖෂධයක ‘සාමාන්‍ය සංකූලතා’ සහ ‘මාරාන්තික සංකූලතා’ පටලවාගෙන තිබෙන බවයි.

මාරාන්තික සංකූලතා සහිත ඖෂධයක් කිසිසේත්ම රෝගීන්ට ලබා දිය නොහැකි බවයි කුමුදේශ් මහතා පවසන්නේ.

''ඖෂධ නියාමන අධිකාරියේ සභාපති අමල්බිසෝව පටලවද්දී, ගහ කොළ පවා උදව් කරලා බේරා ගත්ත වයස අවුරුදු දෙකක තවත් අමල් බිසෝ කෙනෙක් බාල ඖෂධයක් නිසා මිය ගිහිල්ලා. පේරාදෙණිය ළමා රෝහලේ වයස අවුරුදු 2 1/2ක් වයස ඇති බිළිදෙක් මිය ගිහිං. පාදයේ ආබාධයක් සඳහා ශල්‍යකර්මයක් කරන්න ඇතුලත් වෙච්ච දරුවා, නිර්වින්දනය කිරීම සඳහා ලබා දෙන ලද ඖෂධය නිසා ඔහු මිය ගිය බවට බරපතල චෝදනාවක් තියෙනවා.පේරාදෙණිය ළමා රෝහලේ සිදුකළ ශල්‍යකර්මයක් අතරතුර දී නිර්වින්දනය කිරීම සඳහා ලබාදුන් ඖෂධක් හේතුවෙන් මෙම දරුවා මියගොස් ඇති බවට වාර්තා වනවා.රෝහලේ වෛද්‍යවරු විසින් ඒ පිළිබඳව තහවුරු කළ බව, දරුවාගේ පියා සදහන් කර තිබෙනවා. පසුගිය මස 23 වැනිදා පාදයේ ඇතිවූ ආබාධයක් හේතුවෙන් මෙම දරුවා පේරාදෙණිට ළමා රෝහලට ඇතුළත් කර තිබෙන අතර, එහිදී වෛද්‍යවරුන් නිර්දේශ කර ඇත්තේ දරුවා ශල්‍යකර්මයකට භාජනය කළ යුතු බවයි.

ඒ අනුව ශල්‍යකර්මය සිදු කිරීම සඳහා නිර්වින්දන ඖෂධයක් ලබා දී ඇති අතර ඉන් අනතුරුව දරුවා ජීවිතක්ෂයට පත්ව තිබෙනවා.මීට පෙර ද අවස්ථා දෙකක දී පේරාදෙණිය ශික්ෂණ රෝහලේ ප්‍රතිකාර ලබමින් සිටි කාන්තාවන් දෙදෙනෙකු ජීවිතක්ෂයට පත්වූයේ ද නිර්වින්දනය කිරීම සඳහා ලබාදුන් ඖෂධක් හේතුවෙන්. දරු ප්‍රසූතියක් සඳහා එම රෝහලට ඇතුළත් වූ කාන්තාවක් සහ තවත් කාන්තාවක් මෙලෙස මියගොස් තිබුණා.''

ඖෂධ නියාමන අධිකාරියේ සභාපතිවරයාට අනූව එය ඉතාම සාමාන්‍ය තත්වයක් වුවත් ඔහුට අනූව ඖෂධ නියාමන අධිකාරිය ඉදිරි තීරණ ගනු ලැබුවහොත්, රට තුළ බාල ඖෂධයක් නිසා නොමල ගෙයක් සෙවීම, නොමල ගෙයකින් අබ සෙවීමටත් වඩා අසීරු විය හැකි බව රවී කුමුදේශ් මහතා කියාසිටියි.

''ඖෂධ නියාමන අධිකාරිය විසින් රට තුළ භාවිතය සඳහා ඖෂධයක් මුදා හැරීමෙන් පසු, එම ඖෂධය විශ්වාසදායක ලෙස භාවිතා කිරීමට මහ ජනතාවටත්, සෞඛ්‍ය වෘත්තීකයින්ටත් හැකියාව තිබිය යුතුයි. එම ඖෂධය භාවිතයට සුදුසු බවට තහවුරු කිරීමට නියාමන අධිකාරිය අනුගමනය කළ ක්‍රමවේදය කුමක්ද යන්න සොයා බැලීමේ හැකියාවක් සාමාන්‍ය මහජනතාවට නැහැ. NOL ක්‍රමවේදය හරහා ඖෂධයක් මුදා හැරියද, එම වගකීමෙන් මිදීමට අධිකාරියට හැකියාවක් නෑ. ඔවුන් ‘විරෝධතාවයක් නැත’ යන්න මගින් කියවෙන්නෙත්, තත්ත්වය පිළිබඳව කිසිදු ගැටළුවක් නැති නිසා විරෝධතාවයක් නොමැති බව මිස, “මැරෙන්නත් පුළුවන්, ඇස් අන්ධ වෙන්නත් පුළුවන්, ඒ වුණාට අපි විරුද්ද්ධ නෑ” වගේ හාස්‍යදායක අවසරයක් නොවන බව, අධිකාරියේ ප්‍රධාන විධායක නිළධාරි තැන අවබෝධ කර ගත යුතුයි.''

කෙසේ නමුත්, බාල ඖෂධ හේතුවෙන් මරණ තුනක් වාර්තා වී තිබියදී, අධිකාරියේ සභාපතිවරයා සහ ප්‍රධාන විධායක නිලධාරියා විසින් මාධ්‍ය සාකච්ඡා පවත්වා,පොදු මහජනතාව විහිළුවට ලක් කිරීම වෙනුවට,ඔවුන් සදාචාරයක් ඇති වෘත්තිකයින් නම් වහාම ඉල්ලා අස්විය යුතු බවයි කුමුදේශ් මහතා වැඩිදුරටත් අවධාරණය කරන්නේ.

Latest