Skip to content

දෙස් විදෙස් සංචාරකයින්ගේ නෙත් සිත් ඇදගත් දෙමෝදර ආරුක්කු නවයේ පාලම

ජයලත් දිසානායක - බදුල්ල

1893දී බණ්ඩාරවෙල දුම්රිය ස්ථානය ඉදිකරලා නානු ඔය ඉදන් බණ්ඩාරවෙලට කෝච්චිය එන්න පටන් ගන්නවා. ඒ කාලයේ බණ්ඩාරවෙල තමයි උඩරට දුම්රිය මාර්ගයේ අවසාන දුම්රිය ස්ථානය. ඊට පස්සේ බණ්ඩාරවෙල ඉදලා බදුල්ල දක්වා දුම්රිය මාර්ගය 1872 වර්ෂයේදී වැඩ පටන් ගන්නවා. ඉමහත් හිරිහැර බාධක මැද්දේ එය අවසන් වන්නේ 1924 වර්ෂයේදී.

දුම්රිය මාර්ගය සෑදීම සදහා අවශ්‍ය සියලුම අමුද්‍රව්‍ය රැගෙන එන්නේ මහා බ්‍රිතාන්‍යයෙන්. ඔය අතර ඇල්ල දුම්රිය ස්ථානය දක්වා දුම්රිය මාර්ගය සකසා ගෙන එන අතරතුර පළමු ලෝක යුද්ධය ආරම්භ වෙනවා. එම යුද්ධය නිසා මහා බ්‍රිතාන්‍යයේ ඉදලා අමුද්‍රව්‍ය රැගත් නැව් ගමනාගමනය අපහසු වෙනවා. ඒ නිසා උඩරට දුම්රිය මාර්ගය භාරව කටයුතු කල බ්‍රිතාන්‍ය හා ලාංකික ඉංජිනේරුවන් දුම්රිය මාර්ගය ඉදිකිරීම සදහා දේශීය අමුද්‍රව්‍ය යොදා ගැනීම පිළිබදව විමසිලිමත් වෙනවා. දේශීය අමුද්‍රව්‍ය යොදා ගැනීමේදී සවි ශක්තිය හා කල් පැවැත්ම පිළිබද ගැටලු මතු වේ යැයි බියක් හට ගන්නවා. ඒ නිසා කොන්ක්‍රීට් අච්චු ගල් භාවිතයට ගැනීම සදහා අවසානයේදී තීරණය කරනවා.

මේ අවස්ථාව වන විට බණ්ඩාරවෙල බදුල්ල දුම්රිය මාර්ගය ඉදිකිරීම මහත් අසීරු හා කාලය වැය වන ක්‍රියාවක් වී තිබීමත්, මහා බ්‍රිතාන්‍යයේ අධිරාජ්‍යයන් තුන් දෙනෙක්ම ඒ වන විට පත් වීමත් ලංකාවේ බ්‍රිතාන්‍ය ආණ්ඩුකාරවරයන් දස දෙනෙකු යටතේ බණ්ඩාරවෙල - බදුල්ල දුම්රිය මාර්ගයේ කටයුතු සිදු වීමත් ඒ අතර ප්‍රධාන වෙනවා.

ඇල්ල දුම්රිය ස්ථානයේ ඉදලා දෙමෝදර දුම්රිය ස්ථානය දෙසට යෑමේදී ආරුක්කු තුනේ බෝක්කුව ඒ වගේම ආරුක්කු හතරේ සහ ආරුක්කු නවයේ බෝක්කුව වශයෙන් බෝක්කු ගණනාවක්ම කොන්ක්‍රීට් අච්චු ගල් යොදා ගනිමින් නිර්මාණය කරලා තියෙනවා.

දේශීය හා විදේශීය සංචාරකයන්ගේ දැඩි ප්‍රසාදයට හා නැරඹීමට උත්සුක වන ඇල්ල නගරයේ ප්‍රධානතම සංචාරක ඉසව්වක් වන දෙමෝදර ආරුක්කු නවයේ පාලම (බෝක්කුව) ආරුක්කු නවයක් සහිතව උස අඩි 300ක්  (මීටර් 91.44) හා පළල අඩි 25ක් (මීටර් 7.62) වන දැවැන්ත අරුක්කු පාලමකි. පාලම හා එහි ඇති දුම්රිය මාර්ගය 1:44 ක ආනතියකින් තමයි නිර්මාණය කරලා තියෙන්නේ.  ඒ වගේම පාලම නිර්මාණය වන්නේ වංගුවක් සහිතවයි. මේ දුම්රිය මාර්ගය අංශක 9ක වක්‍රතාවයක් ඇති අතර ආරුක්කු 2ක් අතර ඇති දුර අඩි 30කි.

පාලම නිර්මාණය වන්නේ කදු දෙකක් අතර මඩ ගොහොරුවකය. මඩ ගොහොරුවේ පාදම සවි ශක්තියෙන් සකස් කර, විශාල කුලුනු 10ක් ආධාර කර ගෙන ආරුක්කු නවය හදලා තියෙන්නේ. ඒ විශාල කුලුනු මැද සෑම එකකම විශාල කවාකාර හිඩසක් තියෙනවා. වාර්ථා වල අනුව මෙම පාලමේ පාදම සකස් කර ඇත්තේ, ඉතා ගැඹුරට සාදන ලද වලවල් වලට කබොක් ගල් කුට්ටි, කලාතු මිනිරන් කුට්ටි හා කොන්ක්‍රීට් මිශ්‍රණයක් භාවිතයෙන් එකිනෙක සවිවීමට සැලැස්වීමෙනි. එසේම පාලම ඉදිකිරීමේදී පලංචි, ආරුක්කු කොටස් සදහා භාවිතයට ගැනීමට අවශ්‍ය ලෑලි, දැව ආදිය බුරුමයෙන් ආනයනය කරලා තියෙන්නේ. මෙම ආරුක්කු නවයේ පාලම ඉදිකරලා තියෙන්නේ කලුගල් උපයෝගී කරගෙන නෙවෙයි.  ඒ සදහා භාවිතයට අරගෙන තියෙන්නේ 3:2:1 අනුපාතයෙන් සිමෙන්ති, වැලි සහ ගල් මිශ්‍රිත කොන්ක්‍රීට්, අච්චු වලට දමා සකස් කර ගත් කොන්ක්‍රීට් අච්චුගල් වලිනි. එම ගල් එකිනෙක සිමෙන්ති බදාම යොදා බැදගෙන තියෙනවා.

මේ පාලම නිර්මාණය කිරීමේදී දේශීය වශයෙන් අදටත් ප්‍රචලිත මුඛ පරම්පරාගත කතා පුවත් රාශියක් තියෙනවා. එම මුඛ පරම්පරා ගත කතා පුවත් මොනවා උනත්, ආරුක්කු නවයේ පාලමේ දළ සැලැස්ම නිර්මාණය කරලා තියෙන්නේ එච්. ආර් මාර්වුඩ් නමැති බ්‍රිතාන්‍ය ජාතික ඉංජිනේරුවරයා බව ලංකා දුම්රිය ඉතිහාසය ගැන පිරික්සීමේදී කාට උනත් දැන ගන්න පුලුවන්. මෙම පාලමේ වැඩ කටයුතු 1913- 1917 වර්ෂවලදී ආරම්භ කරලා 1919 වර්ෂයේදී අවසන් කරලා තියෙනවා කියලා මූලාශ්‍ර තොරතුරු වල සදහන් වෙන්නේ. එසේම මෙම ස්ථානයේ හා අවට මෙවැනි පාලම් (බෝක්කු) කිහිපයක්ම සෑදීමට මූලික හේතුව වී ඇත්තේ බ්‍රිතාන්‍යයේ විශාල යකඩ හිගතාවයකට ලක්වීමයි. එසේ වීමට පලමු වන ලෝක යුද්ධය යකඩ වැඩි වැඩියෙන් භාවිතයට ගැනීම හා ජර්මානු සතුරු ප්‍රහාරක නැව් විසින්  භාණ්ඩ ප්‍රවාහන නැව් වලට ප්‍රහාර එල්ල කිරීමත් වේ.

ආරුක්කු නවයේ පාලම නිර්මාණය කිරීමේදී ඩී.ජේ විමලසුරේන්ද්‍ර වැනි ලාංකික ඉංජිනේරුවන්ද සහභාගී වෙලා තියෙනවා. එසේම මෙම ආරුක්කු නවයේ පාලමේ පෙදරේරු කටයුතු මෙහෙයවා ඇත්තේ පී.කේ අප්පුහාමි නැමැති පෙදරේරුවා අතින් කියලත් දැන ගන්න ලැබෙනවා. එසේ වුවත් අප්පුහාමි නමැත්තා ගැන මූලාශ්‍ර තොරතුරු වල සදහන් වෙන්නේ නෑ.

මෙම ආරුක්කු නවයේ පාලම නිර්මාණය කිරීමේදී සහය දැක්වූ හැරී චාන්ලී නම් බ්‍රිතාන්‍ය ජාතික ඉංජිනේරුවරයා පලංචියෙන් වැටී එම ස්ථානයේම මිය ගිහිල්ලා තියෙනවා. ඔහුගේ දේහය බදුල්ල ශූ. මාර්ක් දේවස්ථානයේ මිහිදන් කරලා එහි ඔහු වෙනුවෙන් ඵලකයක්ද නිරාවරණය කරලා තියෙනවා.

දෙමෝදර ආරුක්කු නවයේ දුම්රිය පාලම පිහිටලා තියෙන්නේ ඇල්ල හා දෙමෝදර දුම්රිය ස්ථාන දෙක අතරයි. කොළඹ ඉදලා සැතපුම් 169 ¾ ක් දුරින් උඩරට දුම්රිය මාර්ගයේ තමයි මේ ආරුක්කු නවයේ දුම්රිය පාලම පිහිටලා තියෙන්නේ.  මෙතනට ඇල්ල නගරයේ ඇල්ල - නමුණුකුල පාරේ කිලෝමීටරයක් විතර ගිහිල්ලා පොඩි කෝවිලක්  තියෙන තැනක් හම්බ වෙනවා. ඒ ලගම තියෙන පොඩි වැවට බොර වැව කියලා තමයි කියන්නේ. ඒ ළග තියෙන පාර දිගේම පාර අවසන් වන තෙක් යන්න.ඊළගට එහි තියෙන පොඩි අඩිපාරක් දිගේ ආරුක්කු නවයේ පාලම ලගට යන්න පුලුවන්. විදේශිකයන් වැඩි දෙනෙක් තෝර ගන්නේ මේ පාරයි. ඇල්ල නගරයේ ඉදලා ඉතා ඉක්මනින් වැඩි වෙහෙසක් නැතිව මෙතනට එන්නත් පුලුවන්.  වාහනයකින් එනවා නම් ඇල්ල නගරයේ ඉදලා දෙමෝදරට යන පාරේ ඇවිල්ලා ආපහු දකුණට හැරිලා කිලෝමීටර් දෙකක් විතර ගොටුවෙල නම් ගමට ආවම මේ ආරුක්කු නවයේ දුම්රිය පාලම ලගට එන්න පුලුවන්. ලොකු වාහනයක් නම් යන්න බෑ. ඒ වුණාට පොඩි වාහනයක් යන්න පුලුවන්.

Latest