නැවත වතාවක් විදුලි බිල් වැඩිකිරීමට අවසර දෙන ලෙස ලංකා විදුලි බල මණ්ඩලය මහජන උපයෝගීතා කොමිසමෙන් ඉල්ලීමක් කර තිබේ.
ඒ ලංකා විදුලිබල මණ්ඩලය බලන පාඩුව පියවා ගැනීම සඳහා යැයි දක්වමිනි.
මහජන උපයෝගීතා කොමිසම එම ඉල්ලීම ප්‍රතික්ෂේප කර ඇති අතර දැනට සිදුකර ඇති විදුලි බිල් වැඩිකිරීම ප්‍රමාණවත් යැයි ඔවුන් විදුලිබල මණ්ඩලයට දැනුම් දී ඇති බව සඳහන්.
ලංකා විදුලිබල මණ්ඩලයේ සාමාන්‍යාධිකාරී ජී. ඒ. ඩී. ආර්. පී සෙනවිරත්න මහතා මහජන උපයෝගිතා කොමිසන් සභාවේ අධ්‍යක්ෂ ජනරාල්වරයා වෙත ලිපියක් යොමුකරමින් පවසා ඇත්තේ පසුගිය ගාස්තු සංශෝධනයේදී ලංකා විදුලිබල මණ්ඩලය ඉදිරිපත් කළ ගාස්තු අඩුකර මහජන උපයෝගිතා කොමිෂන් සභාව විසින් අනුමත කළ නිසා විදුලිබල මණ්ඩලයේ මේ වසරේ ආදායම රුපියල් බිලියන 33කින් පමණ අඩුවී ඇති බවයි.
පුනර්ජනනීය විදුලිය උත්පාදනය වෙනුවෙන් ගෙවීමට ඇති හිඟ මුදල රුපියල් බිලියන 29.7ක් පමණ බවත් ගිගාවොට් 4,500ක ජල විදුලිය ලබාගැනීමට අපේක්ෂා කළ ද, රට තුළ ඇති වියළි කාලගුණ තත්ත්වය හේතුවෙන් ජල විදුලිය නිපදවා ගැනීමට හැකිවූයේ ගිගාවොට් 1,738ක් පමණක් බවත් එම ලිපියෙන් දැනුම් දී ඇත.
තාප ජනනය මගින් විදුලිය නිෂ්පාදනය ඉහළ යාම, විදුලිය සඳහා ඉල්ලුම ඉහළයාම සහ මණ්ඩලයේ වියදම් පියවා ගැනීම බරපතළ ගැටලුවක් වී ඇති බැවින් රුපියල් බිලියන 33කින් සිය ආදායම ඉහළ නංවා ගැනීම සඳහා විදුලි බිල් වැඩිකිරීමක් සිදුකළ යුතු බවයි සාමාන්‍යාධිකාරීවරයා මහජන උපයෝගීතා කොමිසමට සිය ලිපියෙන් දන්වා ඇත්තේ.
කෙසේවෙතත් දැනට සිදුකර ඇති විදුලි ගාස්තු සංශෝධනය ප්‍රමාණවත් බවට විදුලිබල මණ්ඩලයට පිළිතුරු ලිපියක් යොමුකිරීමට මහජන උපයෝගීතා කොමිසම කටයුතු කර ඇති බව සඳහන්.
