Skip to content

සෞඛ්‍ය පිළිබදව සජිත් ගෙන් පොරොන්දුවක්

මේ රටේ සෞඛ්‍ය ක්ෂේත්‍රය තුළ බරපතල කඩා වැටිමක් සහ ව්‍යවසනයක් සිදුව ඇති බවත්, වසර 30ක් පැවැති ත්‍රස්තවාදය මුලින් උපුටා දමපු මේ රටේ සෞඛ්‍ය ක්ෂේත්‍රය මේ වන විට ත්‍රස්තවාදයක් වී ඇති බවත් විපක්ෂ නායක සජිත් ප්‍රේමදාස මහත පැවසීය.

විපක්ෂ නායක කමිටු රැස්වීමම (13) පාර්ලිමේන්තුවේදී රැස්වූ අවස්ථාවේ සජිත් ප්‍රේමදාස මහතා මේ බව කියා සිටියේය.විපක්ෂ නායකවරයෙකු විසින් පාර්ලිමේන්තුව තුළ කමිටුවක් පිහිටවූ ප්‍රථම අවස්ථාවද මෙය වේ.

වැඩිදුරටත් අදහස් දැක්වූ විපක්ෂ නායක සජිත් ප්‍රේමදාස මහතා මෙසේද පැවසීය.

"බංකොලොත් මේ රටේ ලක්ෂ 220 ක්වූ ජනතාවගේ කරපිටින් මූල්‍ය නාස්තිය, වංචාව, හොරකම, අක්‍රමිකතාව, ගුණාත්මකභාවයෙන් අඩු සහ බාල බෙහෙත්, වෛද්‍ය උපකරණ ගෙන්වීම මෙන් ම රටට තොරතුරු සැගවීම, ඇත්ත කතාකරන වෛද්‍ය ක්ෂේත්‍රයේ විවිධ වෘත්තිකයන් දඩයම් කිරීම, රාජ්‍ය මර්දනය, රාජ්‍ය ත්‍රස්තවාදය ආදී සියලු උපක්‍රම උපයෝගී කර ගෙන නිදහස් සෞඛ්‍ය ප්‍රතිපත්තිය විනාශ කරන වැඩපිළිවෙළක මේ රජය නිරත වන බවත් එය ත්‍රස්තවාදී ක්‍රියාවක්.‍

අද පිහුටුවන ලද මෙම කමිටුව හරහා දූෂණ වංචාවලට වැට බැදීම,සුසමාදර්ශී පාලනයක් උදෙස් විධිවිධාන සැකසීම, ඒ ඒ ක්ෂේත්‍රවල ගත යුතු ක්‍රියා මාර්ග ගැන අවධානය යොමු කිරීම මෙන් ම විවිධ ක්ෂේත්‍රවල පැන නැගී ඇති ගැටළු පිළිබඳ සාකච්ඡා කිරීම සිදු වේ. හුදු දේශපාලන න්‍යාය පත්‍රයකින් තොරව රටට සත්‍ය හෙළිදරව් කිරීම මෙම කමිටුවේ මුඛ්‍ය අරමුණයි."

මෙම අවස්ථාවට පාර්ලිමේන්තු මන්ත්‍රීවරුන් පිරිසක් මෙන් ම රජයේ විකිරණ විද්‍යා තාක්ෂණවේදීන්ගේ සංගමය, රජයේ ඖෂධවේදීන්ගේ සංගමය, සිවිල් අයිතිවාසිකම් සදහා වූ වෛද්‍ය වෘත්තිකයන්ගේ සංගමය, සෞඛ්‍ය වෘත්තීයවේදීන්ගේ ආයතනය යනාදිය නියෝජනය කරමින් නියෝජිතයින් පිරිසක් ද එක්ව සිටියහ.

බෙහෙත් ගෙන්වීමේ දී ප්‍රසම්පාදන ක්‍රමවේදය අනුගමනය කළ යුතු බවට පනතේ සඳහන්ව තිබුණත් එය නොසලකා විශේෂ අවස්ථාවක් යැයි ප්‍රකාශ කරමින් පනතේ 109 වගන්තිය උපයෝගී කර ගෙන මිනිසුන්ගේ මළකදන් මතින් "වෛද්‍ය ව්‍යාපාර" කරන බවත් එහි ප්‍රතිඵලයක් ලෙස බාල නිර්වින්දන ඖෂධ ලබා දීම නිසා පසුගිය කාලයේ දරුවන්ගේ,පුරවැසියන්ගේ ජීවිත රැසක් නැති වූ බවත් විපක්ෂ නායකවරයා සඳහන් කර සිටියේය.

අද වන විට පිළිකා රෝගීන්ට අවශ්‍ය ගුණාත්මක භාවයෙන් ඉහළ උපකරණ ලබා ගැනීමට සෞඛ්‍ය අමාත්‍යාංශය මැළි වී පැරණි උපකරණ භාවිත කරන බවත් සෞඛ්‍ය ක්ෂේත්‍රයේ වෘත්තිකයන් මේ නිසා රට අතහැර යන බවත් සිටින වෘත්තිකයන් රජය දඩයම් කරන බවත් විපක්ෂ නායකවරයා පැවසීය. එසේම ජාතික ඖෂධ නියාමන අධිකාරියේ විශේඥවරු 23ක් ඉන් ඉවත් කර තොරතුරු සඟවා ඇති බවත් සමහර වෛද්‍යවරුන් තොරතුරු ඉදිරිපත් කරන විට ඔවුන්ගේ වැඩ තහනම් කර ඇති බවත් විපක්ෂ නායකවරයා තවදුරටත් මෙහි දී සඳහන් කර සිටියේය.

තොරතුරු දැන ගැනීමේ අයිතිය ඇති රටක සෞඛ්‍ය අමාත්‍යාංශය තොරතුරු සඟවන බවත් පැවසූ විපක්ෂ නායකවරයා මේ රටේ ජනතාවගේ සෞඛ්‍ය සම්පන්නභාවය තහවුරු කිරීමට රට වෙනුවෙන් මහජනතාව වෙනුවෙන් ඇත්ත කතා කරන්න ඉදිරිපත් වන සෞඛ්‍ය වෘත්තිකයන් සහ අනෙකුත් වෘත්තිකයන් වෙනුවෙන් පෙනී සිටි නොමිලේ නීති සහාය ලබා දීමට කටයුතු කරන බව ද  කියා සිටියේය.

මේ සෑම හොරකමක්ම දැක දැක අහක බලා සිටින සියලු දෙනාම සමගි ජන බලවේග රජයක් යටතේ අධිකරණය හමුවට ගෙනවිත් නීතිමය ක්‍රියාමාර්ග ගන්නා බවත්,බාල බෙහෙත් ලියාපදිංචි කිරීම පිළිබඳ රටේ ජනතාවට තොරතුරු දැන ගැනීමේ අයිතියක් ඇති හෙයින් එම තොරතුරු ජනතාවට ඉදිරිපත් කළ යුතු බවත් යම් හෙයකින් එවැනි තොරතුරු සඟවාගෙන සිටී නම් එම පුද්ගලයන්ට නීතිය හමුවට යාමට සිදුවන බවත් පැවසූ විපක්ෂ නායකවරයා කියා සිටියේ හිතාමතාම වැරදි කිරිම තුළ සිදුවන සාපරාධි ක්‍රියාවල නිරතවන, දැන දැන බාල ඖෂධ ගෙන එන,මිනිස් ජීවිත අහිමි කරන පුද්ගලයන්ට නිතිය හමුවේ දැඩි දඩුවම් ලබා දීමට කටයුතු කරන බව යි.

මෙහි දී විපක්ෂ නායකවරයා තවදුරටත් කියා සිටියේ සෞඛ්‍ය ක්ෂේත්‍රයේ පවතින දූෂණ,වංචා,වැඩි මුදලට බෙහෙත් ලබා ගැනීම,රටට සිදුවන හානිය, ඖෂධ වංචා ගැන රජයෙන් ප්‍රශ්න කර සිටින බවත් පාර්ලිමේන්තුව තුළත් ඉන් පිටතත් මීට විරුද්ධව විශාල වැඩපිළිවෙළක් ක්‍රියාත්මක කරන බවත් ය.

රජය මේ වැරදි අඩුපාඩු නිවැරදි කර ගත යුතු බවත් එම නිවැරදි විසදුම් ගන්නා තෙක් විමසිල්ලෙන් සිටින බවත් මෙරට සෞඛ්‍ය පද්ධතියේ බරපතල කඩා වැටීම ඊළඟ මානව ව්‍යවසනයක් විය හැකි හෙයින් මේ සම්බන්ධයෙන් අවධානය යොමු කළ යුතු බවත් පැවසීය.

තවද ආංශික කාරක සභාවලට අමාත්‍යාංශ නිලධාරීන් පමණක් නොව විවිධ සංගම්වල නියෝජිතයන් ගෙන්වීමේ හැකියාවක් පවතින බවත් ඒ තුළින් සත්‍ය අනාවරණය කර ගත හැකි බවත් විපක්ෂ නායකවරයා වැඩිදුරටත් කියා සිටියේය.

Latest